कोशी प्रदेशमा नेकपाले पाउने तीन मन्त्रालय र तीन मन्त्रीको टुङ्गो

विराटनगर । कोशी प्रदेश सरकारमा सहभागी हुने अन्तिम तयारीमा रहेको नेपाली कम्युनिस्ट पार्टी (नेकपा) ले पाउने तीन मन्त्रालयको टुङ्गो लागेको छ । नेकपा संसदीय दलका नेता इन्द्रबहादुर आङ्बो र मुख्यमन्त्री हिक्मतकुमार कार्कीबिच तीन मन्त्रालयका विषयमा सहमति जुटेको हो । जसमा नेकपाले भौतिक पूर्वाधार विकास मन्त्रालय, पर्यटन, वन तथा वातावरण मन्त्रालय र सामाजिक विकास मन्त्रालय पाउने टुङ्गो लागेको छ ।

यस्तै,आन्तरिक मामिला तथा कानुन मन्त्रालयमा नेकपाले दाबी गरेको छ । एमालेले भने उद्योग, कृषि तथा सहकारी मन्त्रालय लिन आग्रह गरेको छ । दलका नेता आङ्बोले आफूहरूले माग गरेको आन्तरिक मामिला मन्त्रालयमा सहमति जुट्न नसकेको बताए । नेकपाले ४ मन्त्रालय पाउने दुई पार्टीबिच यसअघि नै सहमति भएको छ ।