जनता पहिरोको विपत्तिमा छन्, सरकारका मन्त्री खानेपानी र सडकको आश्वासन दिँदै छन् : गैरे

काठमाडौं । सांसद राजेन्द्रलक्ष्मी गैरेले रोल्पा पहिरोका पीडितप्रति सरकारका मन्त्रीको सहानुभूति नदेखिएको बताएकी छन् । “गत साउन २७ मा पहिरोमा परी रोल्पाको थवाङका दर्जनौँ व्यक्तिको ज्यान गएको छ । केही बेपत्ता हुनुहुन्छ । कयौँ घाइते हुनुभएको छ,” गैरेले भनिन्, “यस्तो घटना देख्नु सुन्नु नपरोस्, तर, देखिरहेका–सुनिरहेका छौँ । सरकारका तर्फबाट प्रभावितहरूलाई समयमा उद्धार, राहत र पुनर्स्थापना गर्न सके जनतामा अभिभावकको महसुस हुन्थ्यो ।”

सोमबारको राष्ट्रियसभा बैठकमा बोल्दै उनले सरकारका मन्त्रीहरूका प्राथमिकता अर्कै देखिएको बताइन् । “मन्त्रीहरू कता कता पुगेर सडक र खानेपानीको अश्वासन दिएको सुन्छु,” सांसद गैरेले भनिन्, “सरकार र मन्त्रीहरूको प्राथमिकता के हो ?” उनले युवा नेतृत्वमा आएपछि परिणाम आउँछ भनेर विश्वास गरेका जनतामा छिट्टै निराशा आउन थालेको बताइन् ।