निश्चित व्यक्ति केन्द्रित बन्यो कर्णाली स्वास्थ्य विज्ञान प्रतिष्ठानको पदाधिकारी नियुक्ति कार्यविधि

काठमाडौं– कर्णाली स्वास्थ्य विज्ञान प्रतिष्ठान जुम्लाको पदाधिकारी नियुक्तिको लागि खुला प्रतिस्पर्धाका लागि भन्दै तयार पारिएको कार्यविधि निश्चित व्यक्तिहरुको लागि मात्रै योग्य हुने गरी तयार पारिएको छ । जुम्लास्थित कर्णाली स्वास्थ्य विज्ञान प्रतिष्ठानमा पदाधिकारी छनोट तथा सिफारिससम्बन्धी नयाँ कार्यविधि जारी भएको दुई दिन नबित्दै संशोधन गरिए पनि केही मुख्य प्रावधानहरुका कारण खुला प्रतिस्पर्धाभन्दा पनि निश्चित केही व्यक्ति केन्द्रित मापदण्ड बनेको पाइएको छ ।

प्रतिष्ठानले साउन २७ गते सार्वजनिक गरेको कार्यविधिमा साउन २९ गते नै प्रथम संशोधन गर्दै केही प्रावधानहरू फेरबदल गरेको हो । शिक्षाध्यक्ष (रजिस्ट्रार बाहेकका अन्य पदाधिकारी), डीन र निर्देशकको शैक्षणिक तथा व्यावसायिक योग्यतालाई यथावत् वा स्पष्ट पारिए पनि विशेषगरी रजिस्ट्रार पदको शैक्षिक योग्यतामा हेरफेर गरिएको छ ।