प्रदेशमा नयाँ गठबन्धनको फाइदा प्रचण्डका ज्वाइँलाई, आकर्षक मन्त्रालयसहित मन्त्रीमा ह्याट्रिक !

काठमाडौं । प्रदेशमा जुटेको नयाँ गठबन्धनले नेपाली कम्युनिस्ट पार्टी (नेकपा)का संयोजक पुष्पकमल दाहाल प्रचण्डका ज्वाइँ जीवन आचार्यलाई भने फाइदा भएको छ । यसअघिको काँग्रेससँगको सत्ता गठबन्धन तोडेर एमालेले नेकपासँग नयाँ गठबन्धन गरेपछि सोमबार कोशी प्रदेशमा नयाँ मन्त्रीहरू छानिएका छन् । जसमा प्रचण्डका ज्वाइँ आचार्यले आकर्षक मानिने भौतिक पूर्वाधार मन्त्रालय पाएका छन् ।

कोशीका मुख्यमन्त्री हिक्मत कुमार कार्कीले नेकपाको तर्फबाट जीवन आचार्य, खिनु लङ्वा लिम्बू, गोम्बु शेर्पा र गीता तिम्सिनालाई हिजै मन्त्री नियुक्त गरिसकेका छन् । एमालेसँगको सहकार्यमा गठन हुन लागेको मुख्यमन्त्री हिक्मतकुमार कार्की नेतृत्वको कोशी प्रदेश सरकारमा नेकपाले चार मन्त्रालय पाउने सहमति भएको हो । नेकपाबाट मन्त्री बन्न लागेका आचार्यले भौतिक पूर्वाधार विकास मन्त्रालयको जिम्मेवारी पाउनेछन्। खिनु लङ्वा लिम्बूलाई पर्यटन, वन तथा वातावरण, गोम्बु शेर्पालाई आन्तरिक मामिला तथा कानुन र गीता तिम्सिनालाई सामाजिक विकास मन्त्रालयको जिम्मेवारी दिइने भएको छ।