Tel Lagaune Ra Nimko Pat Khane Din | तेल लगाउने र नीमको पात खाने दिन | २०७८ चैत १९ | Hamro Patro

तेल लगाउने र नीमको पात खाने दिन

नयाँ वर्ष २०७९ को अनेक तरिकाले नव वर्षको स्वागत गर्ने तयारी भइरहेको छ । नयाँ वर्षलाई स्वागत गर्ने अनेकन तरिकाहरु छन् । जसमा नीमको पात खाने र तेल लगाउने तरिका एउटा परम्परागत मान्यता हामी कहाँ छ ।

जुटशित्तल, सिरुवा, नयाँ वर्ष, नयाँ साल लगायत थुप्रै नामले नव वर्षलाई चिनिन्छ । राजा बिक्रमादित्यले चलाएको सम्वत्को २०७९ औं संस्करणमा पाइला चाल्दा तपाई हामी सबै साथ छौं । साल फेरिँदै जान्छन्, शताब्दी थपिँदै जान्छन् । अनि फरक हुँदै जान्छन् सामाजिक आयामहरु । बस मानिस–मानिसबीचको नाता अनि स्नेहमा कमी नआओस्, हाम्रो कामना यही छ ।

कुनै पनि चाड शुरु हुन अगावै तेल लगाएर उक्त चाडको शुरुवात गर्नु एउटा परम्परागत चलन हो । होली, तिहार लगायत अन्य चाडहरुमा पनि एक दिन अगावै शरीर र कपालमा तेल लगाएर उत्सर्गको औपचारिक शुरुवात गरिन्छ ।

नीमलाई तीतो अमृतका रुपमा चिनिन्छ । नयाँ वर्ष शुरु हुन अगावै विगतका वर्षको तितोपनालाई चपाएर आँउदो वर्षको मिठासको पर्खाईलाई नीमको पात खाने चलनले बिम्बका रुपमा बुझाउँछ ।

अर्कोतर्फ नैरोग्यताको प्रतिकका रुपमा नीम खाने चलन पनि चल्दै आएको छ ।

नीम प्राचिनकाल देखि नै एउटा आयुर्वेदिक औषधि का रुपमा प्रयोग हुँदै आइरहेको छ र यो स्वास्थ्यकोलागि धेरै किसिमले फाइदाजनक छ । नीम, हाम्रो शरीर, छाला तथा कपालकोलागि अत्यन्तै फाइदाजनक औषधि हो तर यसको तितो स्वादले गर्दा प्रायले यसको सेवन गर्न मनपराउदैनन् । यसको रस या पात चपाँउदा स्वास्थलाई धेरै फाइदा हुने हुदा यस नयाँ वर्षको अघिल्लो सन्ध्यामा नीमको फाइदा र गुणहरुका बारेमा हामी थोरै जानकारी दिन चाहन्छौं ।

 नीममा भएको एन्टी इंफ्लेमेट्री तत्‍वले चाया, डण्डीफोरआदिलाई नियन्त्रण गर्नुका साथै यसको नियमित प्रयोगले भविष्यमा समेत यसबाट पर राख्दछ नीमको जूस (रस)ले अनुहार तथा शरीरको छालाको रंग निखार्नमा बिशेष भूमिका खेल्दछ ।
नीमको पातहरुको रस र सुद्ध महलाई दुई भाग नीमको रस र एक भाग मह अनुपातमा मिलाएर पिउनाले असाध्यै फाइदा गर्दछ ।

यसरी नीमको पात चपाउने र तेल लगाउने गर्दा हाम्रो शरीरको भित्रि र बाहिरी दुबै तर्फ स्वास्थकर हुने जनविश्वास र प्रमाणित मान्यता छ ।

पौराणिककालदेखि नै नीमको रुख, यसको फाइदा अनि यस्का बहुप्रयोगका अनेकन किस्सा र आर्युवेदीय दृष्टान्तहरु पाइन्छ । नीमको पात खानाले पेटका रोगहरु हरण हुने र तेल लगाउनाले शरीर थप मजबूत हुने र मुलायम हुने विश्वास छ । आँउदो नयाँ वर्षले सबैलाई मजबुती र स्वस्थकर जीवन प्रदान गरोस् । चिताएको पुगोस् ।

हाम्रो पात्रोका लागि सुयोग ढकाल