काठमाडौं– दर्शकहरुले प्रतिक्षा गरिरहेको चलचित्र कोहलपुर एक्सप्रेसको पहिलो गीत ‘सिओडब्ल्यु काउ...' को भिडियो आज सोमबार वसन्त पञ्चमी अर्थात सरस्वती पूजाको अवसर पारेर सार्वजनिक गरिएको छ ।
विवाहका थिममा छायांकन गरिएको यो गीतमा लोकप्रिय संगीतकार राजनराज शिवाकोटीको शब्द, संगीत तथा स्वर समावेश छ । गायनमा राजनराजलाई गायिका मेलिना राईले साथ दिएकी छिन् ।
नृत्यपरक यो गीतको कोरियोग्राफी गम्भिर विष्टले गरेका छन् । गीतमा अभिनेत्री रीमा विश्वकर्मा तथा गम्भिर विष्टको जोडीले आकर्षक नृत्य गरेको छ । दजनौं कोरससहितको उक्त गीतको भिडियोमा चलचित्रका मुख्य कलाकार केकी अधिकारी तथा विनोद न्यौपानेले पनि आकर्षक नृत्य गरेका छन् ।
उक्त गीतको भिडियो हाइलाइट्स रेकर्ड्सको यूट्युब च्यानलबाट सार्वजनिक गरिएको छ । हाल पोस्ट प्रोडक्सनमा रहेको यो चलचित्र नयाँ बर्ष बैशाख का लागि प्रदर्शन मिति तोकिएको छ ।
युवा निर्देशक विशाल भण्डारीको निर्देशनमा अभिनेत्री केकी अधिकारीद्वारा निर्मित यो चलचित्रमा प्रियंका कार्की, केकी अधिकारी, ऋचा शर्मा, बिनोद न्यौपाने, बुद्धि तामाङ, रविन्द्र झा, कुशाग्र भट्टराई आदि कलाकारले अभिनय गरेका छन् ।
