निक्कै लामो समयपछी आर्यन सिग्देल र रेखा थापाले फेरी एकपटक ठुलो पर्दामा आफ्नो केमिस्ट्रीको जादु चलाउन आएका छन् । यसपटक लक्ष्मीपुजाको अवसरमा रिलिज भएको चलचित्र “रुद्रप्रिया” यसै कारण पनि प्रतिक्षित चलचित्र बन्न पुगेको छ । तर रेखा आर्यनको जोडीले “रुद्रप्रिया” मार्फत दर्शकको मन जीत्न सफल हुन्छन त ? जानौ चलचित्र “रुद्रप्रिया”को समीक्षामा ।
प्लट
रेखा थापा(रुद्रप्रिया) आफ्नो पढाइ सकेर आफ्नो हजुरबुवाको साथ बस्न आउछिन् । त्यहाँ उनि आफ्नो स्कुलको साथि आर्यनसंग भेट्न थाल्छिन, आर्यन र रेखाको सम्बन्ध साथि भन्दा अलि माथि किसिमले अघि बढ्न थाल्छ । त्यहि ठाँउको काठ ब्यापारी राजन इशानले एकदिन रेखालार्इ देख्छन् । राजनलार्इ रेखासंग प्रेम हुन्छ, उनले रेखासंग आफ्नो भावना ब्यक्त गर्छन तर राजनको खराब ब्यबहारका कारण रेखाले ढिला नगरी आर्यनसंग बिबाह गर्छिन् । त्यसपछि रेखाको जीवनमा आउने परिवर्तन हेर्न यहाँहरुले चलचित्र “रुद्रप्रिया” हेर्नपर्ने हुन्छ ।
कथा, पटकथा र संवाद
निर्देशक सुदीप बबी भुपाल सिंह र रुबी सेन सिंहले लेखेको चलचित्रको कथा पटकथाले दर्शकलार्इ सरप्राइज गर्नेछ । रेखा थापा आर्यन सिग्देल अभिनित यो चलचित्रलार्इ सबैले मसाला चलचित्रको रूपमा प्रतिक्षा गरेका हुन् । तर चलचित्र निक्कै सरल छ । चलचित्रमा चेलेबेटि माथि हुने एसिड आक्रमणको कथा समेटिएको छ र लेखक निर्देशक आफुले बोकेको मुद्धा न्याय गर्न सुरु देखि नै प्रष्ट छन् । चलचित्रमा धेरै कुराहरु थोपरिन खोजिएको छैन, केहि दृश्यहरुले पक्कै पनि कथामा मोड ल्याउछ , त्यसबाहेक चलचित्र सुरु देखि अन्त्यसम्म एकै हिसाबमा बग्नेगरि लेखिएको छ ।
त्यसबाहेक रेखा र आर्यनको रोमान्स अलि कम भएको अवश्य महसुस हुन्छ । चलचित्रका संवादहरु ठिक ठाक छन् । समग्रमा लेखन निक्कै सरल छ , सरल हुनु अवश्य गलत हैन तर यदि पर्दामा रेखा थापा र आर्यन सिग्देल छन् भने यो सरलता थुप्रैलार्इ खट्किन सक्छ ।
कलाकार
रेखा थापाले चलचित्र रुद्रप्रिया मार्फत “Experiment” गरेकी छिन् । आफुले गरिरहेको किसिमको चलचित्र भन्दा बिल्कुल फरक अन्दाज छ चलचित्र “रुद्रप्रिया”मा । नया प्रयोग गर्दा रिस्क त अवश्य हुन्छ तर पनि रेखा जस्तो स्थापित कलाकारले नँया केहि गर्न खोजेको कुरा सरहानिय छ । उनको काम राम्रो छ । आर्यन सिग्देलले चलचित्रमा रेखा थापालार्इ राम्रो साथ दिएका छन् । राजन इशानको पात्र निक्कै सशक्त हो , तर उनले त्यति धेरै प्रभाव भने छाड्न सकेका छैनन् । पावरफुल पात्रको प्रस्तुति गर्नसक्ने पर्याप्त ठाँउ थियो तर उनले एउटा राम्रो मौका गुमाएको अनुभव हुन्छ ।
प्राविधिक पक्ष र सङ्गीत
सम्पादनका केहि खोटहरुलार्इ नजरअन्दाज गर्ने हो भने रुद्रप्रिया प्राविधिक हिसाबले अव्वल छ । राजन इशानको ब्याकग्राउण्ड म्युजिक ठिकठाक छ । गीतहरुमा राजन राज सिवाकोटीको “चिरबिर चिरबिर चाचरी” अर्जुन पोखरेलको “तिम्रो बाहेक अरु” र सुरेश अधिकारीको “घरि घरि” सबै उत्कृष्ट छन् ।
निर्देशन
निर्देशक सुदीप बबी भुपाल सिंहले सत्य घटनाबाट आधारित रहेर चलचित्र “रुद्रप्रिया” निर्देशन गरेका हुन् । उनले चलचित्रलार्इ निक्कै सरल बनाएका छन् अझ उनले चलचित्रको ट्विसटहरुलाई समेत धेरै नाटकीय बनाएका छैनन्, जुन अवश्य प्रशंशनिय हो । तर सरलतासंग मानोरंजन जोडिएर आएको भए बेग्लै मजा आउनेथ्यो । चलचित्रले मनोरंजन निक्कै कम दिनेछ र आर्यन र रेखाको प्रेममा समेत थप रोचक केहि भएको भए हुन्थ्यो जस्तो दर्शकलार्इ लागि रहनेछ । निर्देशक सुदीप बबी भुपाल सिंहले आफ्नो काम राम्रोसंग गरेका छन् ।
समीकरण
रेखा आर्यनको “रुद्रप्रिया” यहाँहरुको लागि एउटा सरप्राइज हुनेछ । यो चलचित्र भिन्न छ । रेखा आर्यनले आफ्नो नामसँगै ठुलो अपेक्षा लिएर आउने गर्दछन् । चलचित्र हेरेपछि धेरै दर्शक खिन्न हुने अवश्य छ । मानोरंजन कम भएकाले पनि दर्शकको ध्यान केन्द्रित नरहला ।
Liked by:
