पहिलो खेलमा पाकिस्तानसँग हार बेहोरेको टिम नेपाललाई दोश्रो खेल निक्कै महत्वपूर्ण छ । एसिया कपमा नेपालले सहभागिता मात्र जनाउन हैन, प्रतिष्पर्धा गर्न आएको हो भनेर विश्वलाई देखाउने अवसर छ । तर, भारत जस्तो कडा प्रतिष्पर्धीसँग उत्कृष्ट प्रदर्शन गर्नु नेपालको लागि अवश्य कठिन छ ।
नेपालले जस्तै एसिया कपमा भारतले पनि आफ्नो पहिलो खेल पाकिस्तानसँग खेल्यो । वर्षाका कारण खेलबाट नतिजा आउन सकेन । हुन त नेपाल र भारत बीचको खेल पनि वर्षाले प्रभावित पार्ने सम्भावना प्रबल छ। तर, नेपाली समर्थकहरू भारतसँगको खेल जसरी भएपनि सम्पन्न होस् भन्ने पक्षमा छ । प्रिमियर कप जस्तो ठूलो प्रतियोगिता जितेर एसिया कप पुगेको नेपाल एक खेल मात्र खेलेर फर्किनु पर्यो भने नेपाली क्रिकेट प्रेमीहरूलाई बेमज्जा हुन्छ । खेल पनि होस् अनि खेल उत्कृष्ट पनि होस् भन्ने सबैको इच्छा छ।
विश्वकपको तयारीमा रहेको भारतले विकेटकिपर ब्याट्सम्यान के एल राहुल र आफ्नो पहिलो सन्तानको जन्म हुनलाग्दा छुट्टी लिएका जसप्रित बुमराह बिना नै यो खेल खेल्नेछन् । पहिलो खेलमा सोचे अनुरुप ब्याटिंग प्रदर्शन नगरेको भारतले आफ्नो कमी कमजोरीहरू सुधार्ने प्रयास गर्नेछ। तर यदी नेपाल कमजोर टिम हो भनेर कम आकेमा भारतले पक्कै पनि नेपाललाई अवसरहरू प्रदान गर्नेछ । ठूलो खेलमा नेपालले सानो सानो कुराहरू आफ्नो पक्षमा लाग्दै जानुपर्नेछ । क्याचहरू छाडेमा फेरीपनि पाकिस्तानसँग जस्तै हारको सामना गर्नुपर्ने हुन्छ । किनकि भारतका विश्वस्तरीय खेलाडीहरूले दोश्रो मौका हत्तपत्त दिदैनन् ।
पाकिस्तानसँगको खेल पछि नेपालले पनि आफूले सुधार्नु पर्ने क्षेत्रहरूको विशेष ध्यान राखेको होला । एक दिवसीय खेलमा विकेट गएपछि साझेदारी आवश्यक हुन्छ, नेपालका खेलाडीहरूले यसमा विशेष ध्यान दिनुपर्ने हुन्छ । टप अर्डरका ब्याट्सम्यानले आफ्नो विकेट सम्हाल्न ध्यान दिनुपर्ने हुन्छ । आफ्नो विकेटलाई महत्व दिएर खेले अवश्य पनि नेपालले पाकिस्तानसँग भन्दा राम्रो खेल प्रस्तुत गर्नेछ ।
टिमको सन्तुलनको लागि भिम सार्कीको बिना नै मैदानमा उत्रिएको टिम नेपालले दोश्रो खेलमा पनि कुनै परिवर्तन गर्छ जस्तो लाग्दैन । भारतको लागि भने जसप्रित बुमराहको स्थानमा मोहम्मद शामी आउने लगभग पक्का छ ।
नेपालको सम्भावित ११ :
कुशल भुर्तेल, आसिफ शेख, रोहित कुमार पौडेल, कुशल मल्ल, आरिफ शेख, दिपेन्द्र सिंह ऐरी, गुलशन झा, सोम्पाल कामी, सन्दीप लामिछाने, करण केसी, ललित राजबंशी
भारतको सम्भावित ११ :
रोहित शर्मा, शुभमन गिल, विराट कोहली, श्रेयस अईयर, इशान किशन, हार्दिक पाण्ड्या, रविन्द्र जाडेजा, शार्दुल ठाकुर, मोहम्मद शमी, मोहम्मद सिराज, कुलदीप यादव
एसिया कपको दोश्रो खेलको लागि नेपाललाई शुभकामना । तपाईंहरूले एसिया कपको सम्पूर्ण खेलको लाइभ अपडेटहरू हाम्रो पात्रोमा हेर्न सक्नुहुनेछ ।
Liked by:
