२०७४ चैत, १४ गते | नइ प्रकाशनले सनातन हिन्दूधर्मसंस्कृतिको सम्बर्धन, संरक्षण र जागरणका लागि मन, वचन र कर्मबाट समर्पित प्राध्यापक डा. वेणीमाधव ढकाललाई ‘नइ चन्द्रधन पुरस्कार’ समर्पण गर्ने निर्णय गरेको नइ प्रकाशनका सदस्यसचिव नरेन्द्रराज प्रसार्इले जानकारी दिनुभयो ।
त्यसैगरी नेपालको राष्ट्रियता तथा भौगोलिक अखण्डताका लागि सदैव चिन्तन, विश्लेषण र प्रचारप्रसारका साथै भ्रष्टाचार विरोधी अभियानमा समेत अहोरात्र समर्पित भएर मातृभूमिप्रति अर्पेको विशिष्ट योगदानका निम्ति साहित्यकार श्री भरत जङ्गमलार्ई ‘नइ कीर्तिनिधि पुरस्कार’ समर्पण गर्ने निर्णय भएको छ ।
नेपाली आख्यान, नाटक र निबन्धलेखनका क्षेत्रमा प्रयोगशील विशिष्ट योगदान गरी राष्ट्रिय तथा अन्तर्राष्ट्रिय जगतमा नेपाली साहित्यलाई गरिमाशाली तुल्याउनमा उल्लेखनीय भूमिका निर्वाह गरेबापत डा. ध्रुवचन्द्र गौतमलाई ‘नइ खरा सुकीर्ति पुरस्कार’ समर्पण गर्ने निर्णय गरिएका छ ।
गीतिकविता लेखनका माध्यामबाट नेपाली भाषालाई जनप्रिय बनाउन उल्लेखनीय योगदान गर्नुका साथै तत्कालीन समयमा वृत्तचित्र र समाचार चित्रहरूमा सर्वोत्कृष्ट उद्घोषणद्वारा जनमन छुन सफल श्री किरण खरेललाई ‘नइ भाजप पुरस्कार’ समर्पण गर्ने निर्णय गरिएकोे छ ।
यी चारै वटा पुरस्कारका राशि जनही एकएक लाख रूपियाँ रहेका छन् ।
नइ प्रकाशनका अध्यक्ष श्रीमती इन्दिरा प्रसाईको अध्यक्षतामा बसेको नइ प्रकाशनको बैठकले सो निर्णय गरेको हो ।
शताब्दी पुरुष डा.सत्यमोहन जोशीद्वारा उहाँको ९९ औं शुभजन्मोत्सवका अवसरमा आगामी वैशाख ३० गते काठमाडौंमा नइ पुस्कारहरु समर्पण गरिने छन् ।
Liked by:
