यो शीर्षकमा लेख्ने सोचिराख्दा दुई कुरा तछाडमछाड गर्दै दिमागमा आइरहे । दुइवटैको बेलिबिस्तार लाउने अनुमतिमा यहाँ राखेँ ।
मम्मी त विदेशीले भन्न सिकाए हामीलाई आपतविपतमा कहाँ मम्मी आउँछ आमा नै आउँछ भनेर सानो कक्षाका गुरुले भन्नुहुन्थ्यो । सायद तेसो भन्ने गुरुबाले आमा कै सम्बोधन गर्नुहुन्थ्यो होला । आफूलाई गाह्रो साह्रोमा त मम्मी नै मुखबाट निस्कन्छ । आमा, मुमा, मामु नि आउँदैन । सानैदेखि जे बानी पर्यो तेही त आउने होला ।
दोस्रो कुरो यो मातातीर्थ औंसी हो मदर्स डे हैन । अंग्रेजी बोल्ने शासकका साम्राज्यवादले हामीलाई यति साह्रो गाँजेको छ कि हामी आफ्नै चाडमा विदेशी भाव जोड्ने भएछौं । नभा मातालाई सम्झने दिन, उनको महिमामा लीन हुने दिन मदर्स डे नहुनु पर्ने । नभा त घोडेजात्रा हर्स डे अनि नागपञ्तमी स्नेक डे हुनुपर्ने हैन र?
यी त फिलर्स जस्ता कुरा भए । अलि पिरोलेको कुरा । अलि सोचनीय कुरो ।
लोकल चाडले सन्सार पिट्ने बेलामा अरुका जस्ता सुनिने चाड किन बनाउनु । आफ्नै मौलिक कुरो प्रचार हुँदा देश नै चिनिने हो । रिसर्चले संस्कृति र चाडपर्वहरु विदेशीले धेर हेर्न रुचाउने कुरा हुने भनेर देखाको नि छ ।
कुनै बेला संसार भनेको मेल्टिङ्ग पट जस्तो थियो । जे जति राखिए सबै पग्लिए, अस्तित्व गुमाए । जुन चिज अलि बढी थियो तेस कै रङ्ग देखियो । सोझो अर्थमा ठूलो चिज हावी भयो साना ढाकिए ।अहिलेको संसार बौल अफ सलाद जस्तो । सलादमा सबै चिज देखिन्छन् र स्वाद पनि बैग्लै तर सँगै । हो यो सलादको कचौरामा हाम्रा चाड विशिष्ट छन् भन्ने झल्कियोस्, देखियोस् । 
सबैलाई आफ्नो आमा अलि विशेष नै लाग्छन् । स्वार्थ नजोडिएको सम्बन्ध नै आमासँगको हो । आफ्नो सन्तानलाई संसार कै राम्रो देख्ने नि आमाहरु नै हुन् नि । आमाको पवित्रता आत्मसात गर्ने, केही क्षण नै सही बिताउने, उनलाई मन परेको खुवाउने समग्रमा खुसी बनाउने अवसर आजको दिन । मम्मी आज भौतिक रुपमा मुख हेर्न नपाको नि सात वर्ष बढी भइसकेछ । हजुरको नाति केटोले शान्ति आमा भग्वानकोमा चाँडै गइस्यो भन्छ । के याद छ त आमाको भन्दा बोकेको भन्छ । त्यो एक वर्ष नि नपुगेको विचराले के पो याद राख्न सक्यो होला तैपनि बेला बेलामा सम्झिन्छ ।
बढाउने, साथ दिने भन्दा छिर्के हान्ने बढी भेटिने आजको समयमा जिवनरुपी जाँतो पिसाइ सहज छैन । त्यस्तामा नि आफ्नो छोरो सबैलाई जित्ने तागत राख्छ भन्ने विश्वास राख्ने तपाईलाई मेरा शब्द श्रद्धा । कैयन् सकिदैन र अब भयो भन्ने परिस्थितिमा अघि बढाउने पेट्रोल नै यी तपाइँका विश्वास नै त हो मम्मी ।
हजुरलाई र सम्पूर्ण आमाहरुलाई नमन ।
Liked by:
