जब फेवा तालमा साँझ पर्यो (तस्वीरहरु)

नेपालको पोखरा अनि पोखराको फेवाताल । जहाँ सबैको मन बसेको छ, जहाँ प्रकृतिले पृथ्वीलाई दुलही झै सजाएको छ, जहाँ प्रकृतिले प्रवृत्तिलाई सकारात्मक धारमा डोहोर्याउँदछ । चाहे जत्तिकै तनाव या चापमा त्यहाँ कोही किन नपुगोस् ? त्यहाँको प्रकृतिले हाम्रो तनाव लिने प्रवृत्तिलाई टाटा बाईबाई गरिदिन्छ ।

यही साँझ र यिनै बिहानहरु जब फेवा तालको किनारमा पर्दछन तब देख्ने आँखाहरुले बाजी राखेका छन् कि ती साँझ अनि बिहानहरु अलौकिक हुन्छन् । माछापुच्छ्रेको छायाँमा जब घाम डुब्दै जान्छ, पारी देखिएको रानी वन र शान्तिस्तुपामा जब किरणहरु हराउँदै जान्छन् , तब प्रकृतिको मनोरम छटामा मानव हृदय यसरी डुब्दछ कि मानौ कोही नपिएरै पिएको बराबर मदहोश छ ।

फेवा तालमा डुङ्गा का लस्करहरु, पानीका अनि पानीमा छायाँहरु, माझी अनि यात्रुहरु, तालबाराहीमा बलेको बत्तिका धर्साहरु, निलो आकाश अनि ती सबैकुराहरुको एकमुष्ठ रोमाञ्चकता । आउनुहोस् सुश्री लिडिया लामाले हाम्रो पात्रोलाई उपलब्ध गराउनुभएको तस्वीरमार्फत प्रस्तुत छ, फेवातालमा साँझ पर्यो । 

सुयोग ढकाल