Mahalakshmi Puja Bidhee | Hamro Patro

ब्लग - साहित्य / अध्यात्म

महालक्ष्मी "पूजा विधि"




   ज्यो.पण्डित नारायण प्रसाद दुलाल - Nov 14 2020

या सा पद्मासनस्था विपुलकटितटी पद्मपत्रायताक्षी
गम्भीरावर्तनाभिस्तनभरनमिता शुभ्रवस्त्रोत्तरीया ।
या लक्ष्मीर्दिव्यरूपैर्मणिगणखचितैः स्नापिता हेमकुम्भैः
सा नित्यं पद्महस्ता मम वसतु गृहे सर्व माङ्गल्ययुक्ता ॥

सुख रात्रि अर्थात् कार्तिक कृष्ण औँसीका दिन धनधान्य र समृद्धिकी देवी लक्ष्मीजीको पूजा अर्चना गरी यमपञ्चकको तेश्रो दिन लक्ष्मी पूजा मनाइन्छ । झिलिमिली, उज्यालो, पशुपक्षीको पूजा, भाईबहिनीको प्रेम, सेलरोटी र मिठाई, फूलमाला, देउसीभैलो तथा नेपाल संवत्को प्रारम्भ, महाकवि जयन्ती जस्ता विशेषता बोकेको यमपञ्चक अन्तर्गत लक्ष्मीपूजाको दिन घर वरीपरी सरसफाई गरी सिङ्गारेर बत्तीले झिलिमिली पारी घर आँगनमा गाईको हरियो गोवर तथा रातोमाटोले लिपेर लक्ष्मी पूजा गरेमा लक्ष्मीजीले घरमा सधैँ बास गर्छिन् र ऐश्वर्य प्रदान गर्छिन् भन्ने धार्मिक विश्वास रहिआएको छ ।

यसै विश्वासका कारण लक्ष्मी पूजाको दिन घर–घरमा दीपमालिकासहित दीपावली गरिन्छ । यस मानवीय जीवनमा अणिमा आदि अष्टसिद्धि र सबै प्रकारको सुख मीलोस्, घरमा लक्ष्मी प्रवेश गरुन् भन्ने चाहनाले भक्ति पूर्वक आँगन वा चोकदेखि ढुकुटीसम्म लक्ष्मीको पाइला अङ्कित गरिन्छ र यसै पाइलाबाट लक्ष्मीजी घरभित्र प्रवेश गरिदिनुहुने र स्थिर रहनुहुन्छ भन्ने धार्मिक विश्वास रहेको छ ।

यस दिन प्रातः उठेर नित्यकर्म गरी दिनभर लक्ष्मीको नाममा व्रत तथा उपासना गरेर सन्ध्याकालमा लक्ष्मीको पूजा गर्नुपर्दछ । सुसज्जित ठाउँमा या मण्डपमा पूर्वाभिमुख भएर सुरुमा दाहिने तर्फ दियो, देब्रे तर्फ कलश र माझमा गणेशजीको पूजा गरेर मात्र लक्ष्मीजीको आराधना गर्नु पर्दछ ।

यस दिन विशेष रूपले गणेश, इन्द्र, कुबेर र लक्ष्मीको स्थापना गरी प्राणप्रतिष्ठापूर्वक पूजन गर्नुपर्दछ । मण्डप निर्माण गर्न नसके पनि पूजास्थानमा तामा वा काँसको थालीमा अष्टदल लेखी अष्टदलको बीचमा लक्ष्मीको सुवर्णप्रतिमा स्थापना गर्नुपर्दछ ।

सर्वप्रथम हातमा द्रव्य र जल लिएर "मेरो घरमा मलाई वेद, पुराण, धर्मशास्त्रहरूले बताए अनुसार अहिलेसम्म प्राप्त गर्न नसकेकी लक्ष्मी प्राप्त हऊन् र आर्जित लक्ष्मी दीर्घकालसम्म रहिरहून्, यसका लागि दीप–कलश–गणेश महालक्ष्मीसहित, सरस्वती, इन्द्र र कुबेर आदिको पूजा गर्दछु ।" यस्तो संकल्प पश्चात् अर्घ स्थापनागरी दियो पूजा गरेर विघ्नहर्ता गणेश भगवानको ध्यान तथा आवाहन सहित ॐ गं गणपतये नम: भन्दै सबै उपचारले पूजा गरिसके पछि धुप, दिप, फल, प्रसाद, दक्षिणा गर्दै गणेशजीको पूजा गर्ने तत्पश्चात् इशानकोणमा रहेको वरुण कलशको पनि यसै गरि पूजा गर्नु पर्दछ ।

श्रद्धा एवं भक्तिले गरिने लक्ष्मीपूजाको लागि कुनै साइतको आवश्यकता नपर्ने भएपनि गोधुली स्थिर लग्न (वृष) र सूर्यास्तको बीचमा अर्थात् लक्ष्मीपूजाको लागि साँझ ०५/१२ बाट ०७/०८ सम्मको समय उत्तम रहेको छ भने सिंह लग्नको शुभ समय रात्री ११/४३ देखि १/५५ को समय उत्तम छ ।
|
महालक्ष्मीजीको प्रतिमा, मुर्ति वा फोटो राख्ने र महालक्ष्मीजीको पूजनकोलागि हातमा कमलफूल रातो अक्षतालिएर ध्यान गर्दै चढाउने यदि प्रतिमा, मुर्ति वा फोटोको प्राणप्रतिष्ठा नभएको भए प्राणप्रतिष्ठा गर्ने र फूल अक्षता सहितले आवाहनगर्ने र कुशको आसन राखिदिने, ॐ महालक्ष्मै नम: भन्दै पाद्य, अर्घ, आचमनी, दुध, दही, घ्यू, मह, चिनी तथा पञ्चामृतले स्नान गराउनु पर्दछ तत्पश्चात् शुद्ध जलले स्नानगराई दही, घ्यू र मह मिश्रित मधुपर्क तथा गंगाजलले स्नान गराई महालक्ष्मीलाई आफ्नो गच्छे अनुसार श्रद्धा एवं भक्तिले चन्दन, रोली, सिन्दुर, टिका, अक्षता, वस्त्र, सौभाग्य चढाउनु पर्दछ तत्पश्चात् जौ, तिल, फूल, माला, दुबो, बेलपत्र, सहित सम्पूर्ण उपचारले पूजनगरि धूप, दिप, विभिन्न प्रकारको नैवेद्य, फलफूल, पान, सुपारी, भोगटे, कौडी, धनिया, कमलगट्टा, कमलको फूल, जटानरिवल विशेष रूपमा चढाइन्छ, यसरी गरिएको पूजाबाट श्रीवृद्धिका साथै ऐश्वर्य प्राप्त हुन्छ भन्ने विश्वास छ, त्यसपछि रातो फूल हातमालिई प्रार्थना गर्दै पुष्पाञ्जली गर्नु पर्दछ ।

यसै समयमा माता सरस्वती र कुवेरजीकोपनि पूजा गर्नु पर्दछ । तत्पश्चात् हातमा फूल, चन्दन र अक्षताले अङ्गपूजा गर्ने
ॐ चपलायै नमः, पादौ पूजयामि ।
ॐ चञ्चलायै नमः, जानुनी पूजयामि ।
ॐ कमलायै नमः, कटिं पूजयामि ।
ॐ कात्यायन्यै नमः, नाभिं पूजयामि ।
ॐ जगन्मात्रे नमः, जठरौ पूजयामि । स्तनौ पूजयामि ।
ॐ विश्ववल्लभायै नमः, वक्ष:स्थलं पूजयामि ।
ॐ कमलवासिन्यै नमः, हस्तौ पूजयामि ।
ॐ पद्मानानायै नम:, मुखं पूजयामि । ॐ कमलपत्राक्ष्यै नम:, मुखं पूजयामि ।
ॐ श्रियै नमः, शिरः पूजयामि ।
ॐ महालक्ष्म्यै नमः, सर्वाङ्गं पूजयामि ।

यसरी अङ्गपूजन पश्चात् अष्टदलमा अष्टसिद्धिको पूजापनि गर्न सकिन्छ:
आणिम्ने नम:, २. महिम्ने नम:, ३. गरिम्णे नम:, ४. लघिम्ने नम:, ५. प्राप्त्यै नम:, ६. प्राकाम्यै नम:, ७. ईशितायै नम: र ८. वशितायै नम: ।

यसरी अष्टसिद्धिको पूजन पश्चात् अष्टदलमा नै अष्टलक्ष्मीको पूजापनि गर्न सकिन्छ:
आद्यलक्ष्म्यै नम:, २. विद्यालक्ष्म्यै नम:, ३. सौभाग्यलक्ष्म्यै नम:, ४. अमृतलक्ष्म्यै नम:, ५. कामलक्ष्म्यै नम:, ६. सत्यलक्ष्म्यै नम:, ७. भोगलक्ष्म्यै नम: र ८. योगलक्ष्म्यै नम: ।

अब महालक्ष्मीजीको निराजन आरति सङ्ख, घण्ट सहित श्रद्धा एवं भक्तिले गर्नुपर्दछ र पुन:
ॐ अमलकमलसंस्था–तद्रजः पुञ्जवर्णा
करकमलधृतेष्टा भीतियुग्माम्बुजा च ।
मणिमुकुटवित्रतालङ्कृता कल्पजालै–
र्भवतु भुवनमाता सन्ततं श्रीः श्रियै नः ।।

यो मन्त्र द्वारा पुष्पाञ्जली गरेर आरतिलाई सितलगरि सबैजनाले आरतिलिनु र आफ्नो मनोकामना पूर्णहोस् भनि जगत् जननी महालक्ष्मीलाई साष्टाङ्ग प्रणामगरि आशिर्वाद लिनु पर्दछ । यसरी गरिएको पूजाबाट महालक्ष्मी प्रसन्नभई भक्तहरूको मनोकामना अवस्यनै पुरा गर्नुहुनेछ । अस्तु ।।

- ज्यो.पं. नारायणप्रसाद दुलाल



Liked by
Liked by
0 /600 characters
Hamro Patro - Connecting Nepali Communities
Hamro Patro is one of the first Nepali app to include Nepali Patro, launched in 2010. We started with a Nepali Calendar mobile app to help Nepalese living abroad stay in touch with Nepalese festivals and important dates in Nepali calendar year. Later on, to cater to the people who couldn’t type in Nepali using fonts like Preeti, Ganesh and even Nepali Unicode, we built nepali mobile keyboard called Hamro Nepali keyboard.