पाठकवृन्द आजको दिन एउटा विशेष दिन हो । हाम्रो पात्रो परिवारले यो दिनलाई अझ विशेष किन मान्दछ भने यो दिनले नेपालमा मात्र होइन, विश्वभर महिला हिंसाको अन्त्य गर्न वकालत गर्छ । विश्वभर गरिएका विभिन्न अध्ययनहरुले अहिले पनि प्रत्येक तीन महिलामा एक महिलामाथि हिंसा भएको तथ्याङ्क सार्वजनिक गरेका छन् । अनि आजको दिन हो, अन्तर्राष्ट्रिय महिला हिंसा अन्त्य दिवस ।
अन्तर्राष्ट्रिय महिला दिवस र आजको दिनमा केही भिन्नताहरु छन् । विश्वभर अन्तर्राष्ट्रिय महिला दिवस ८ मार्चमा मनाउने गरिएको छ । महिला हिंसा अन्त्य दिवस आजको दिन मनाउने गरिए पनि यो १६ दिनसम्म चल्ने कार्यक्रम हो । आजदेखि १० डिसेम्बरसम्म चल्ने विभिन्न अभियान, कार्यक्रमहरु सन्चालन हुन्छन् ।
यस वर्ष हामीले यही अभियानमा जोडिएर विश्वभर नाम कमाएकी भारतीय अभियन्ता कमला भासिनलाई गुमाएका छौँ । सन् १९४६ मा जन्मिएकी कमला भासिनको निधन २५ सेप्टेम्बर २०२१ मा भएको थियो । नेपालमा पनि महिलाको हकहित सुरक्षित गर्न तथा अरु विभिन्न कार्यक्रमहरुमा भासिन आएकी थिइन् । जतिबेला विश्वमा महिला ‘अपराइजिङ’को सबैभन्दा ठूलो अभियान सुरु भएको थियो, त्यति बेला पनि भासिन नेपाल आएकी थिइन् । हाम्रो पात्रो परिवार महिलाको उत्थानका लागि आफ्नो जीवन समर्पित गरेकी भासिनप्रति हार्दिक श्रद्धान्जली अर्पण गर्दछ ।
अब चर्चा गरौँ, आजको दिन विशेष के हो भन्नेबारे । आजको दिनलाई महिला हिंसा अन्त्य दिवसका रुपमा मनाउन थालिएको सन् १९८१ देखि हो । यसको पछाडि पनि कारण छ । डोमिनिकन रिपब्लिकमा तत्कालीन समयमा त्यहाँका तानाशाह राफेल ट्रुलिजाले तीन महिला अधिकारकर्मीलाई क्रुर तरिकाले हत्या गर्ने निर्देशन दिएका थिए । उनको निर्देशनअनुसार तीन मिराबल दिदीबहिनीको हत्या भएको थियो ।
यही दिनको सम्झनाका रुपमा आज अन्तर्राष्ट्रिय महिला हिंसा अन्त्य दिवसका रुपमा मनाउन थालिएको हो ।
७ फ्रेबुअरी २००० मा संयुक्त राष्ट्रसंघको महासभाले पनि २५ नोभेम्बरलाई अन्तर्राष्ट्रिय महिला हिंसा अन्त्य दिवसका रुपमा मनाउन औपचारिक रुपमा सुरुवात गरेको हो ।
विश्वमा कुनै न कुनै समयमा पुरुषप्रधान नेतृत्व भएकाले महिलामाथि हुने हिंसाको स्वरुप र प्रारुप, तौर र तरिकाका अनेक रुपहरु आइरहेका हुन्छन् । महिला हिंसा बाहिर मात्र होइन, घरेलू हिंसाका रुपमा पनि रहेको हुन्छ । यसको अन्त्य आजको समाज र विश्वको आवश्यकता हो ।
महिलामाथि हुने हिंसाको आवाजलाई बाहिर ल्याउनकै लागि केही वर्षयता मिटू अभियान पनि चलेको छ । यो अभियनाले महिलामाथि हुने हिंसाको अन्त्यका लागि ठूलो भूमिका खेलेको विश्वभर भएका विभिन्न अध्ययनले देखाएका छन् ।
हाम्रो समाजमा पनि विभिन्न तौर र तरिकामा महिलामाथि हिंसा भइरहेका छन् । यसमा हाम्रो भूमिका पनि रहन सक्छ, यसको अन्त्य गर्न प्रण गरौँ ।
हाम्रो पात्रोको तर्फबाट हामीले महिलामाथि हुने हिंसा अन्त्य गर्न भूमिका खेलौँ भन्ने सन्देशका साथ आजबाट सुरु हुने महिलामाथि हुने हिंसाको अन्त्यको कामना पनि ।
Liked by:
