विवाहमा कुण्डली मिलान कत्तिको महत्त्वपूर्ण हुन्छ ?
विवाहमा वर वधू को कुण्डली मिलान अत्यन्त महत्वपूर्ण विषय हो । यदि जीवनमा दाम्पत्य जीवनको सुख चाहनुहुन्छ भने अवश्य पनि वर वधूले विवाह पूर्वनै कुण्डलीको अवलोकन गराउनु पर्दछ। यदि कुण्डली मिलान राम्रो भएन भने त्यो विवाहमा वैवाहिक सम्बन्ध खासै राम्रो हुँदैन भनेर ज्योतिष शास्त्रले बताएको छ । अहिलेको समयमा यो विषयलाई खासै महत्त्व दिइएको पाइदैन जसको फलस्वरूप वैवाहिक जीवन निकै कष्टकर बनेको पाइन्छ । विवाह भएको छोटो समयमा नै सम्बन्धमा समस्या उत्पन्न भएको घटनाहरूले समाजमा दुखित तुल्याएको छ।
मिलानकुण्डलीमा विषेश गरि ८ प्रकारको विषयलाई तुलना गरिन्छ र जम्मा ३६ गुण बताइन्छ । विवाहमा थोरैमा पनि १८ भन्दा माथि गुण आउन जरुरी हुन्छ। यदि १८ गुण आएन भने त्यो विवाहलाई अनुमति हुँदैन भनेर ज्योतिष शास्त्रले बताएको छ। विवाह गर्दा गुण मिलान गराएर गरिएको वैवाहिक सम्बन्ध राम्रोसँग चल्ने शास्त्रले बताएको छ। वर्ण ,वैश्य ,तारा, योनी, ग्रह मैत्री, गण , भकुट र नाडी गरि ८ विषयलाई हेर्ने गरिन्छ । जस बाट ३६ गुण मिलान भएको हुन्छ । यही विषयलाई हेर्ने र १८ माथि आएको अवस्थामा ज्योतिषगुरुहरूले ग्रह गोचरका आधारमा विश्लेषण गर्ने गर्नुहुन्छ। यसकै आधारमा कुण्डली कस्तो छ, विवाह कस्तो हुन्छ भन्ने विषयको निश्चय गरिन्छ । अहिले यो विषयलाई वास्ता नगरी विवाह गरेर केही समय पछि नै सम्बन्ध विच्छेद भएको पाइन्छ । गुण, नाडी, गण आदि सबैलाई सम्बन्धको सूचकको रूपका हेर्ने गरिन्छ। यदि सबै मिलेको अवस्थामा सकारात्मक सम्बन्ध रहन्छ भने नमिलेमा नकारात्मक असर पार्ने शास्त्रले बताएको छ। तसर्थ यस्तो महत्वपूर्ण विषयलाई नजरअन्दाज नगरी विवाह गर्न आवश्यक छ ।
-ज्यो. मुकुन्द नेपाल
Liked by:
